Կոտայքի մարզի Ակունք գյուղի բնակիչ, 37-ամյա Աշոտ Գեւորգյանը մեղադրվում է իր կնոջը սպանելու, երկու անչափահաս աղջիկներին դանակահարելու մեջ եւ այս օրերին դատավարությունը տեղի է ունենում Կոտայքի մարզի ընդհանուր իրավասության առաջին ատյանի դատարանում:

«Փաստինֆո»-ն ավելի վաղ տեղեկացրել էր, որ 2013 թվականի հունիսի 9-ին ողբերգություն էր տեղի ունեցել Ակունք գյուղում.իրենց իսկ տանը` երեկոյան ժամը 21:30-ի սահմաններում, ըստ ոստիկանության,  Աշոտ Գևորգյանը դանակահարել և սպանել է կնոջը` 1982 թ. ծնված Անուշ Գասպարյանին, դանակով մարմնական վնասվածքներ հասցրել դստրերին` 2001 թ. ծնված Շողակաթ և 2007 թ. ծնված Մարիամ Գասպարյաններին, որից հետո՝ դանակով հարվածել է իրեն` ստանալով որովայնի առաջնային պատի կտրած-ծակած վերք:

Դատաբժշկական եզրակացությունների համաձայն,  Ա.Գեւորգյանը դանակով հարվածներ է հասցրել կնոջ կրծքավանդակին և որովայնի առաջնային պատին:  Երեք մարմնական վնասվածք պատճառվել է 12-ամյա Շողակաթին` աջ թուլակողի, ձախ թուլակողի և աջից որովայնի շրջանին,  իսկ  6-ամյա Մարիամին վնասվածք էր պատճառվել որովայնի առաջնային պատին և աջ զստոսկրի թևի շրջանին, որոնք ռեալ վտանգ են պարունակել կյանքի համար: Բարեբախտաբար երեխաների կյանքը հաջողվել է փրկել:

Ա.Գեւորգյանին մեղադրանք է առաջադրվել դիտավորյալ սպանության եւ կյանքի համար վտանգավոր մարմնական վնասվածքներ պատճառելու համար, իսկ գործը գտնվում է դատավոր Յուրի Բաղդասարյանի վարույթում:

Նշենք, որ գործին որպես իրեղեն ապացույց կցվել է 6 հատ  դանակ` առգրավված դեպքի վայրից:

Լուսանկարը՝ shamshyan.com-ի