Դերասան Գնել Սարգսյանի և «Շանթ» հեռուստաընկերության միջև ծագած անհաշտության մասին ESem.am-ը պատմել է իր ընթերցողներին, ինչպես նաև տեղեկացրել, որ աշխատանքից դուրս գալուց հետո նա այլ առաջարկներ չի ստացել: Գնելի հետ զրուցեցինք գործունեության ներկա փուլի, հեռուստաընկերության հետ խնդրի լուծման մասին և պարզել, արդյոք հեռուստաընկերությունները զգուշանու՞մ են Գնել Սարգսյանից: 

Ինչպես նշեց Գնելը, ինքը շահել է ոչ թե դատական գործը, այլ թեման: «Ես և հեռուստաընկերությունը փոխշահավետ համաձայնության եկանք, և ես հայցս հետ վերցրեցի»,- պարզաբանեց Գնելն ու հավելեց, որ ինքը բավարարված է լուծման տարբերակով:

Մեր նախորդ զրույցում Գնելը նշել էր, որ եթե շարունակի չստանալ նոր առաջարկներ, կընտրի երկրից հեռանալու տարբերակը: Դերասանից տեղեկացանք, որ մինչ օրս նոր առաջարկ չի ստացել, ինքն էլ չի հետաքրքրվում նոր աշխատանք գտնելու համար. «Ես փնտրտուքների մեջ չեմ, քանի որ միշտ էլ ասել եմ` ես չպետք է խնդրեմ, որ ինձ նկարահանեն, ինձ պետք է առաջարկեն, որ ես համաձայնեմ: Կարծում եմ` ես դա վաստակել եմ»:

Այս շրջանում նա այլ աշխատանք էլ չունի, սակայն առաջիկայում կփորձի նոր գործ ձեռնարկել: Ինչ վերաբերում է արտերկիր մեկնելուն` այժմ դա հնարավոր չէ: «Ես ամիսներ շարունակ չեմ աշխատել և որոշակի պարտք ունեմ բանկին: Եթե մեկնեմ, Ռուսաստան կամ այլ մոտ երկիր չեմ մեկնելու: Այնպես որ, նախ պետք է այդ հարցերը լուծեմ,- ասաց Գնելն ու ընդգծեց, որ ի սկզբանե ենթադրում էր, որ իր քայլի հետևանքները կարող են այսպիսին լինել, սակայն գերադասել է մինչև վերջ գնալ: -Ամեն դեպքում ձուկը գլխից է հոտում: Եթե մինչև վերջ մնայի սերիալում, բնականաբար, ակտուալ կլինեի: Այս երկար լռությունը կարող էր իր ազդեցություննն ունենալ: Ես գիտակցում էի հնարավոր խնդիրները, սակայն բավականին լուրջ էի տրամադրված, եթե անգամ, դա իմ ապագայի հաշվին էր: Ես թևս կտրած ռուս չեմ, անգործ չեմ մնա և չեմ զղջում իմ քայլի համար»:

Ժամանակին դերասանը դուրս էր եկել նաև «Արմենիա» հեռուստաընկերությունից, ինչից հետո աշխատանքի էր անցել «Շանթում»: Գնելի հավաստմամբ` «Արմենիայի» հետ կոնֆլիկտ չի ունեցել: «Եղել է աշխատանքային անհամաձայնություն, ինչից հետո որոշել ենք այլևս չաշխատել միասին, սակայն դա չի ազդել մեր հարաբերությունների վրա,- ասաց Գնելն ու հավելեց,  որ ինքը «Շանթի» հետ էլ խնդիր չունի և առաջարկի դեպում կաշխատի այդ հեռուստաընկերության հետ: -Թեև չեմ կարծում,  որ առաջարկ կլինի»: