Չորեքշաբթի օրը Վատիկանի Սրբ. Պետրոսի հրապարակում Հռոմի Պապ Ֆրանցիսի հանդիպումը այլանդակված դեմքով մարդու հետ մեծ քննարկումների առիթ է դարձել: Լրատվամիջոցներում ու սոցիալական կայքերում հիացմունքով են արտահայտվում այդ հանդիպման մասին: Հռոմի Պապը աղոթել է նեյրոֆիբրամատոզով տառապող մարդու համար և համբուրել նրան:

Նեյրոֆիբրամատոզը գենետիկ հիվանդություն է, որը կարող է թույլ տեսողության, խլության, մտավոր հետամնացության, միգրենի և նույնիսկ քաղցկեղի պատճառ հանդիսանալ: Հիվանդության բուժումը շատ բարդ է: Այս հիվանդությամբ տառապող մարդիկ միշտ իրենց տեսքի պատճառով բախվում են խտրականության: Ուխտագնացներին հրապարակում ողջունելուց հետո, Պապը մի քանի րոպե դադար է առել, որպեսզի ընդունի հիվանդ մարդուն: