Ոստիկանությունը պարզաբանել է հոկտեմբերի 31-ին, Երեւանի Օհանով փողոցի թիվ 76 շենքի բնակարաններից մեկի բնակչի կողմից իր բազկերակները կտրելու սպառնալիքի տեղեկությունը:

Ոստիկանության հաղորդագրության մեջ, մասնավորապես, նշվում է.

«Հոկտեմբերի 31-ին, ժամը 15.43-ին, ոստիկանության Մալաթիայի բաժնում ահազանգ է ստացվել, որ Երեւանի Օհանովի փողոցի 76 շենքի մի բնակիչ, Ուկրաինայի վիզա չստանալու պատճառով, ուզում է կտրել երակները։

Ահազանգով մեկնած ոստիկանության ծառայողները նշված շենքի բնակարաններից մեկից Մալաթիայի բաժին են հրավիրել Գուրգեն Հ.-ին:

Կատարված ստուգմամբ պարզվել է, որ նա հոկտեմբերի 31-ին դիմել է ոստիկանության Մալաթիայի անձնագրային բաժանմունք՝ օտարերկրյա պետություններում վավերականության ժամկետը երկարաձգելու համար իր անձնագրում համապատասխան նշում կատարելու, սակայն մերժվել է, քանի որ անձնագրի էջերը պատռված են եղել, ինչի կապակցությամբ բաժանմունքի աշխատակիցն առաջարկել է նախ դիմում գրել անձնագիրը փոխելու համար, որից հետո հնարավոր կլինի նոր անձնագրում օտարերկրյա պետություններում վավերականությունը հավաստող կնիք դնել։

Քաղաքացին դժգոհելով` դուրս է եկել, սակայն նույն հարցով մի քանի անգամ դիմել է բաժանմունքի աշխատակցին` ստանալով նույն պատասխանը։ Որոշ ժամանակ անց անձնագրային բաժանմունք է եկել ոստիկանության Մալաթիայի բաժնի աշխատակիցն ու հայտնել, որ այդ քաղաքացուց ահազանգ է ստացվել, թե իբր իր անձնագրում կնիք չդնելու պատճառով ինքը ցանկանում է իրեն վնասել:

Գուրգեն Հ.-ն իր բացատրության մեջ նշել է, որ ինքն իրեն որեւէ վնաս պատճառելու նպատակ չի ունեցել, զայրույթի պահին է նման քայլի դիմել, բացի այդ, իրեն պարզաբանվել է օգտագործման համար ոչ պիտանի անձնագրում վավերականության հաստատման կարգը, եւ ինքը ներկայումս ոչ ոքից որեւէ բողոք կամ պահանջ չունի»:

Ավելի վաղ NEWS.am-ը հայտնել էր, որ ըստ ԱԻՆ փրկարար ծառայության, հոկտեմբերի 31-ին, ժամը 15.25-ին ահազանգ է ստացվել, որ Երեւանի Օհանով փողոցի թիվ 76 շենքի բնակարաններից մեկի բնակիչը սպառնում է կտրել բազկերակները:

Դեպքի վայր է մեկնել ՃԿԿ օպերատիվ խումբը:

Պարզվել է, որ Գ. Հ.-ը (1985թ.) հաշվառված է հոգեբուժարանում եւ ոստիկանության անձնագրերի եւ վիզաների վարչությունում խնդիրներ ունենալու պատճառով փորձել է կտրել բազկերակները:

Ոստիկանության աշխատակիցներն ուղեկցել են Գ. Հ-ին անձնագրերի եւ վիզաների վարչություն՚ առաջացած խնդիրը պարզելու: