Ավան եւ Նոր Նորք վարչական շրջանների ընդհանուր իրավասության դատարանը դադարեցրել է քրոջ որդուն կացնահարելու մեջ մեղադրվող Վանյա Բաղդասարյանի նկատմամբ քրեական հետապնդումը: «Փաստինֆո»-ն ավելի վաղ տեղեկացրել էր, որ Ավանի իր սեփական բնակարանում՝ 2012 թվականի դեկտեմբերի 16-ին կացնահարվել էր Երեւանի բնակիչ Գարիկ Կուրդիյանը, որի համար մեղադրանք էր առաջադրվել վերջինիս քեռուն` Վանյա Բաղդասարյանին։ Ըստ քրեական գործի նյութերի՝ Գարիկ Կուրդիյանն այդ ընթացքում հյուրընկալել էր իր քեռուն՝ Վանյա Բաղդասարյանին , ով ժամանակավորապես բնակություն էր հաստատել նրա տանը։ Դեպքի օրը քեռին ու զարմիկը կենցաղային հարցերի շուրջ վիճաբանել են, որի ընթացքում Վ.Բաղդասարյանը խոհանոցից վերցրել է կենցաղային օգտագործման կացինն ու հարվածել Գարի Կուրդիյանին՝ դիտավորությամբ նրան պատճառելով առողջությանը ծանր վնասվածքներ: Վ.Բաղդասարյանին մեղադրանք է առաջադրվել ՀՀ քրեական օրենսգրքի 112-րդ հոդվածի 1-ին մասով՝ դիտավորությամբ ծանր մարմնական վնասվածք պատճառելու համար, իսկ կացինը՝ որպես իրեղեն ապացույց, կցվել է քրեական գործին։ Ի դեպ, որպես խափանման միջոց ընտրվել է ստորագրություն՝ չհեռանալու մասին, եւ օգոստոսի 16-ին քրեական գործն ուղարկվել էր դատարան: Սակայն, ինչպես հայտնի դարձավ «Փաստինֆո»-ին, դատարանը դադարեցրել է քեռու նկատմամբ քրեական հետապնդումն ու կարճել քրեական գործը՝ նրա մահվան հիմքով. Պարզվում է՝ Վ.Բաղդասարյանն ինքնասպանություն է գործել: 2013թ. օգոստոսի 31-ին` ժամը 13:50-ին, ոստիկանության Դիլիջանի բաժնում հաղորդում էր ստացվել, որ Դիլիջան քաղաքի Կալինինի փողոցի թիվ 2 հասցեում հայտնաբերվել է ծառից պարանով կախված ինքնությունը չպարզված տղամարդու դիակ: Իրավապահները հետագայում պարզել են դիակի ինքնությունը, եւ որ դա Վանյա Բաղդասարյանն է, հայտնում է pastinfo.am-ը: Դատախազ Հ.Չախոյանը սեպտեմբերի 18-ի դատական նիստում միջնորդել է դադարեցնել ամբաստանյալ Վ.Բաղդասարյանի նկատմամբ քրեական հետապնդումը և քրեական գործի վարույթը կարճել` նրա մահանալու հիմքով՝ նկատի ունենալով, որ վերջինս քրեական գործի նախաքննության ընթացքում իրեն լիովին մեղավոր է ճանաչել՝ Կուրդիյանին մարմնական վնասվածք պատճառելու համար և փաստացի հիմքեր չկան, որ գործի վարույթն անհրաժեշտ է մահացածի իրավունքների վերականգման համար կամ ուրիշ անձանց նկատմամբ նոր ի հայտ եկած հանգամանքների կապակցությամբ գործը վերսկսելու համար: Տուժող Գ.Կուրդիյանը չի առարկել միջնորդության դեմ, եւ դատարանը սեպտեմբերի 18-ին կարճել է գործը: