Կոտայքի մարզի ընդհանուր իրավասության դատարանի Աբովյանի նստավայրում Յուրի Բաղդասարյանի նախագահությամբ ընթանում է Արամ Ներսիսյանի և Անահիտ Օհանյանի գործի դատավարությունը: Ըստ մեղադրանքի՝ 37-ամյա Արամ Ներսիսյանը համաձայնության գալով իր 39-ամյա կնոջ՝ Անահիտ Օհանյանի հետ, 2012-2013 թվականների ընթացքում իրենց հետ նույն հարկի տակ ապրող քրոջ անչափահաս երեխաներին՝ 1999 թվականին ծնված Ռ.-ին և 2002 թվականին ծնված Ի.-ին շահագործելու նպատակով, նրանց նկատմամբ բռնություն գործադրելով, բռնություն գործադրելու սպառնալիքով ստիպել է զբաղվել մուրացկանությամբ, շահագործել է նրանց, ստացել երեխաների վաստակած գումարները և ուղղել իրենց ընտանիքի կարիքները հոգալուն: Արամ Ներսիսյանին ու Անահիտ Օհանյանին այս դրվագով մեղադրանք է առաջադրվել ՀՀ քրեական օրենսգրքի 132.2 հոդվածի 2-րդ մասի 1-ին, 2-րդ և 4-րդ կետերով:

Բացի այդ, Արամ Ներսիսյանը կրկին Անահիտ Օհանյանի հետ նախնական համաձայնությամբ իր ծնողներից ժառանգություն մնացած բնակարանը վաճառելու նպատակով գնորդ է գտել, պայմանավորվել, 2008 թվականի ընթացքում ստացել շուրջ 7 հազար դոլար կանխավճար, որից մոտ 5 հազար դոլարը ծախսել է իր կարիքների համար: Հետո գնորդի հետ ունեցած պայմանավորվածությունը չեղյալ է հայտարարվել: Չկարողանալով վերցրած կանխավճարը վերադարձնել գնորդին՝ Արամ Ներսիսյանը, ըստ մեղադրանքի, հարազատ քրոջը՝ վերոհիշյալ երեխաների մայրիկին շահագործելու նպատակով, նրա կյանքի և առողջության համար ոչ վտանգավոր բռնություն գործադրելով ու բռնություն գործադրելու սպառնալիքով, սկզբում ծեծի ենթարկելով, այնուհետև ծեծելու սպառնալիքով 2009-2012 թվականների ընթացքում հարկադրել է մուրացկանություն անել ու հավաքած գումարներով փակել իր վերոհիշյալ պարտքը: