«Գոյ» թատրոնի դերասան, հեռուստասերիալներից հայտնի դերասան Աշոտ Տեր-Մաթևոսյանին ESem.am-ը առիթ ունեցել է անդրադառնալու: Տևական ժամանակ է, ինչ դերասանը հեռուստատեսային նախագծերում ընդգրկված չէ, ինչն էլ նրա երկրպագուների շրջանում անհանգստության ալիք է բարձրացրել. խոսակցություններ էին պտտվում, թե Աշոտն առողջական լուրջ խնդիրներ ունի և այժմ ապաքինվում է:

Տարածված բամբասանքներին մեկընդմիշտ վերջ տալու և դերասանի հանդիսատեսին հանգստացնելու համար խոսեցինք վերջինիս հետ, ով ESem.am-ի հետ զրուցեց տևական դադարի, առաջիկա ծրագրերի և անձնական կյանքի մասին: Ինչ վերաբերում է առողջական խնդիրներին` Աշոտը ծիծաղելով նշեց. «Փառք Աստծո, ողջ-առողջ եմ և ոչ մի խնդիր չունեմ»:

Դերասանն իր տևական դադարը կապեց նոր հեռուստածրագրերի բացակայության հետ. «Էկրաններին չերևալուս միակ պատճառը նոր հեռուստասերիալների բացակայությունն է: Որպես հյուր` մասնակցում եմ տարբեր հաղորդումների, բայց չկա մի այնպիսի ծրագիր, որի կազմում աշխատեմ»:

Դերասանը, խոսելով իր առաջիկա ծրագրերից, նշեց. «Բոլոր այն հեռուստադիտողները, ովքեր կցանկանան նորից ինձ տեսնել, կարող են հետևել Հանրային հեռուստաընկերության քսան մասից բաղկացած «Հատուկ բաժին» գեղարվեստական ֆիլմաշարին: Բացի դրանից, սկսել եմ ֆիլմեր կրկնօրինակել»:

Ըստ Աշոտի` իր գործունեությունն այսքանով չի սահմանափակվում. բացի հեռուստատեսային նախագծերից, ինքը նախկինի պես աշխատում է «Գոյ» թատրոնում, որտեղ ընդգրկված է մի քանի ներկայացումներում: Դերասանը նկարահանվում է նաև Հրաչ Քեշիշյանի նոր` «Ամերիկուհին» գեղարվեստական ֆիլմում` մարմնավորելով գլխավոր դերակատարներից մեկին: Ֆիլմը, հավանաբար, գարնանը կլինի մեծ էկրաններին:

Խոսելով անձնական կյանքից` Աշոտը հերքեց այն լուրերը, թե ինքն ու դերասանուհի Էթերի Ոսկանյանը սիրավեպ ունեն: «Չգիտեմ, որտեղից են նման լուրերը տարածվել: Ես ու Էթերին միայն լավ ընկերներ ենք: Մենք անգամ հաճախ չենք հանդիպում, իրար տեսնում ենք ընկերական ընդհանուր հավաքույթների ժամանակ: Անձնական կյանքումս նորություն չկա, անձնականս գործնական է դարձել :)»:

Աշոտի փոխանցմամբ` դստերը չի կարողանում հաճախ հանդիպել զբաղվածության պատճառով. «Օրակարգս շատ խառն ու ծանրաբեռնված է, այդ իսկ պատճառով ուշ-ուշ եմ հանդիպում աղջկաս հետ, բայց հնարավորության դեպքում մենք տեսնվում ենք»: