"Empyray” խմբի մենակատար Սարգիս Մանուկյանի` ԱՄՆ մեկնելու մասին ESem.am-ըպատմել է իր ընթերցողներին: Թեև խմբի անդամներից Գիսանե Պալյանը, ով շատ մտերիմ է Սարգսի հետ, զգուշանում էր նշել` երգիչն ընդմի՞շտ է մեկնել, թե` ժամանակավոր, խումբն իր համար նոր մենակատար է ընտրել: "Empyray”-ի նոր անդամը Գոռ Սուջյանի քույրն է` Եվա Սուջյանը:

«Ամիսներ առաջ Սարգիսն անձնական հարցերով մեկնեց ԱՄՆ, սակայն խումբը չէր կարող դադարեցնել գործունեությունը: Նոր մեներգչի համար փոքրիկ մրցույթ անցկացրեցինք, սակայն հասկացանք, որ դա ապարդյուն էր: Որոշեցինք Եվային առաջարկել աշխատել մեզ հետ: Նա էլ սիրով համաձայնեց»,- ESem.am-ին ասաց խմբի երաժիշտ Գիսանե Պալյանը: "X factor” նախագծի շրջանակներում Եվան եղել է Գիսանեի խմբում, սակայն նրանք մինչ այդ են ծանոթ եղել. «Հայաստանում ռոք երաժիշտները քիչ են, և բոլորն իրար ճանաչում են ռոք փառատոններց, միջոցառումներից: Եվան շատ լավ է ընկալում և վերարտդրում ռոք մշակույթը, ինչը շատ կարևոր է: Կարծում եմ` շատ հեշտ կներգրավվի մեր աշխատանքներում»: Նշենք, որ մինչ այս խումբը Եվայի հետ համագործակցելու առիթ ունեցել է. նրանք զուգերգ ունեն:

Մեներգչից մեներգչուհու անցնելը Գիսանեն ռիսկային չի համարում` հաշվի առնելով Եվայի հնարավորությունները. «Սարգիսը շատ գեղեցիկ տեմբրով պրոֆեսիոնալ վոկալիստ է: Եթե տղամարդու ընտրեինք, նա պետք է լիներ ավելի լավը, քան Սարգիսը: Ցավոք, մենք չունեինք այդպիսի թեկնածու: Որոշեցինք Եվային ընտրել, քանի որ նա շատ ավելի մեծ էներգետիկա ունի, քան շատ տղամարդ երգիչներ (իհարկե խոսքը Սարգսի մասին չէ) և կարող է ուժեղ կերպար ստեղծել բեմում»:

Սարգիս Մանուկյանը շարունակում է երաժշտական գործունեություն ծավալել: Այժմ նա ԱՄՆ-ում մենահամերգի է պատրաստվում: Այս անգամ էլ Գիսանեն դժվարացավ նշել` Սարգիսն ընդմի՞շտ է մեկնել ԱՄՆ: «Կարծում եմ` այժմ ինքն էլ հստակ չգիտի այդ հարցի պատասխանը: Նա անձնական պայմաններից ելնելով է մեկնել,- ասաց երաժիշտն ու հավելեց, որ Սարգիսը շարունակում է մնալ իրենց լավ ընկերը: -Հաջորդ տարի պատրաստվում ենք նշել "Empyray”-ի 20 ամյակը, այդքան տարի կապված ենք Սարգսի հետ: Բացի այն, որ գործըներներ ենք, նաև մտերիմ ընկերներ ենք: Սարգիսն իմ ու Կարենի երեխաների կնքահայրն է և տարածությունը մեզ չի խանգարում լավ ընկերներ մնալ»:

Դեռ մի քանի շաբաթ է, ինչ "Empyray”-ն ու Եվան միասին են աշխատում, սակայն արդեն պատրաստվում են նոյեմբերի 21-ին Սունդուկյանի անվան թատրոնում կայանալիք բարեգործական համերգին, որի ժամանկ Եվան կներկայացնի խմբի ոչ միայն հին ու արդեն սիրված, այլև նոր երգերը: Համերգի ժամանակ ելույթ կունենան նաև "The Beautified Project” և «Ջեզլ» խմբերը:

"Empyray”-ն առաջիկայում նոր երգեր կձայնագրի: Խումբը պատրաստվում է նաև նոր տեսահոլովակ նկարահանել:

esem.am