Ցանկացած աղջիկ երազում է գեղեցիկ արտաքինի մասին: Անհնար է հաշվել, թե ամբողջ կյանքում որքան ուժ եւ գումար ենք վատնում դրա համար: Հայ աղջիկների շրջանում անցկացված հարցումների համաձայն, նրանց ամենամեծ խնդիրը քիթն է: Եթե հարցումներն անցկացվեին նաեւ Հայաստանում բնակվող տղամարդկանց շրջանում, պատասխանը, հավանաբար, նույնը կլիներ: Այդ պատճառով NEWS.am STYLE-ը որոշեց զանգահարել երեւանյան հիվանդանոցներ եւ պարզել, թե ի՞նչ արժե «երազանքի քիթը»: 

Պարզվում է՝ քթի վիրահատության մի քանի տեսակ կա:

1. Սեպտոպլաստիկա

Արտաքին տեսքի հետ կապված ամենատհաճ երեւույթը, թերեւս, քթի միջնապատի թեքությունն է, որը դժվարացնում է շնչառությունը: Միջնապատը շտկելու համար կատարվող վիրահատությունը կոչվում է սեպտոպլաստիկա: Հայաստանում այն արժե 400.000 դրամ:

2. Քթի ծայրի վիրահատությունն արժե 450.000 դրամ:

3. Առաջնային ռինոպլաստիկա

Առաջին անգամ արվող քթի պլաստիկ վիրահատությունը կոչվում է առաջնային: Այն վիրաբույժին քթի նոր չափսեր ստանալու ավելի լայն հնարավորություն է տալիս, որոնք սահմանափակվում են միայն անատոմիական առանձնահատկություններով` կախված նրա նախնական չափսից, մաշկի տեսակից (օրինակ՝ կոշտ մաշկով մեծ քթից հնարավոր չէ փոքրիկ քիթ ստանալ, իսկ քթի փոքր ծայրը հնարավոր չէ մեծացնել, քանի որ հյուսվածքները ձգվելու սահման ունեն): Այս վիրահատությունը շուրջ 550.000 դրամ արժե:

4. Կրկնակի ռինոպլաստիկա

Առավել դժվար խնդիր է առաջնային անորակ ռինոպլաստիկայի արդյունքում առաջացած թերությունները շտկելը կամ վերականգնողական անբարեհաջող շրջանը: Կրկնակի ռինոպլաստիկան, ըստ էության, քթի երկրորդ լիարժեք վիրահատություն է, որը կատարվում է ընդհանուր անզգայացմամբ ու հետվիրահատական-վերականգնողական երկարատեւ շրջանով: Կախված այն վիրաբույժի առջեւ դրված խնդրից՝ այն կարող է լինել ինչպես բաց, այնպես էլ` փակ վիրաբուժական տարբերակով:

Այս վիրահատությունը կարող է առավել բարդ լինել (ըստ այդմ՝ ավելի թանկ): Բացի այդ, կրկնակի ռինոպլաստիկայի հնարավորություններն առաջինի համեմատ հիմնականում առավել սահմանափակ են. նույնիսկ ամենապրոֆեսիոնալ վիրաբույժը չի կարող էսթետիկ անթերի արդյունք երաշխավորել: Կրկնակի ռինոպլաստիկան արժե շուրջ 750.000 դրամ:

Այսպիսով, երազանքնների քիթը կարող է արժենալ 1.000 դոլարին համարժեք դրամ: Մինչեւ վիրահատվելու որոշում կայացնելը մեկ անգամ եւս նայեք հայելու մեջ: Չէ՞ որ այդ գումարը կարող եք օգտագործել մեծ քանակությամբ իրեր գնելու կամ էլ ճամփորդության համար:

NEWS.am STYLE