Արդեն տեղեկացրել ենք, որ այսօր այցելել էինք «Էրեբունի» բժշկական կենտրոն, որտեղ փորձում էինք տեղեկություններ ստանալ վթարի ենթարկված դերասան Վարդան Պետրոսյանի առողջական վիճակից։ Մինչ փորձում էինք զրուցել հերթապահ բժշկի հետ, վերակենդանացման բաժանմունք բերեցին մի երիտասարդ աղջկա։

Որոշ ժամանակ անց արդեն հայտնի դարձավ, որ աղջիկն ինքնասպանության փորձ է կատարել։ Ինչպես մեզ հետ զրույցում պատմեց Լիլիթի բարեկամը, դեպքը տեղի է ունեցել աղջկա ընկերուհու՝ Մարիի վարձած բնակարանում (բնակարանը պատկանում է Լիլիթի տատիկին):

20-ամյա աղջիկը մտել է լոգասենյակ և սովորականից երկար է մնացել այնտեղ։ Երբ ընկերուհին անհանգստացել է, Լիլիթը բացել է դուռը, դուրս եկել լոգասենյակից և մի քանի րոպե անց սկսել է փսխել։ Մարին փորձել է հասկանալ՝ ինչ է կատարվում, բայց Լիլիթը նրան ոչինչ չի ասել։ Ի վերջո, Մարին մտել է լոգասենյակ և այնտեղ Ասպիրինի 3 դատարկ «լիստ» է հայտնաբերել ու անմիջապես զանգահարել շտապօգնություն։

Հերթապահ բժիշկը Hraparak.am-ի հետ զրույցում ասաց, որ իրենք հիվանդին ընդունել են ծանր վիճակում, բայց սպասում են, որ ավելի կծանրանա։ Այդուհանդերձ, այս պահին Լիլիթի կյանքին վտանգ չի սպառնում։ 

Այժմ անդրադառնանք պատճառներին։ Լիլիթի բարեկամը մանրամասներ հայտնեց աղջկա ընտանեկան վիճակի մասին, որոնք կարող էին իքնասպանության փորձի պատճառ հանդիսանալ։

Լիլիթը 6 տարեկանում կորցրել է հորը։ Այդուհետ նրանց տանը բազում անախորժություններ են եղել։ Ի վերջո, աղջկա մայրը, ով ի դեպ աշխատում է «Էրեբունի» բժշկական կենտրոնում, որոշել է առանձին ապրել, իսկ Լիլիթին մեծացրել է տատիկը՝ հոր մայրը։ Լիլիթի եղբայրն էլ ապրում է մյուս տատիկի տանը։

Երկու օր առաջ Լիլիթը վիճում է տատիկի հետ, հեռանում տնից և այդ գիշեր չի վերադառնում։ Հաջորդ օրը, երբ տուն է գնում, վիրավորված տատիկը նրան վռնդում է՝ ասելով կարող ես գնալ մորդ հետ ապրել։ Լիլիթն էլ հավաքում է իրերն ու գնում ընկերուհու տուն, որտեղից էլ տեղափոխվում է հիվանդանոց։

hraparak.am