Սլանում ես քո մեքենայով։ Հարթ ճանապարհ, զով օդ, սիրածդ երգի հաճելի ելևէջները շոյում են նյարդերդ. մեկ էլ հանկարծ երաժշտական գեղեցիկ կատարումը վերածվում է ինչ-որ անհասկանալի ոռնոցի, կամ էլ գործիքավորման մեջ անհասկանալի կերպով թխկթխկոցներ ու շխկշխկոցներ են հայտնվում: Ինչ անել նման անսպասելի ու ոչ ցանկալի երևույթներից խուսափելու և լսողական համակարգը փորձարկումների չենթարկելու համար:

Նախ պետք է հասկանալ, թե որտեղից կարող են գալ այդ՝ հարվածային գործիքների ձայներ հիշեցնող շխկշխկոցներն ու թխկթխկոցները: Նման հնչյուններ կարող են արձակել ինչպես մեքենայի անվադողերը, մեքենայի ստորին մասում գտնվող մեխանիզմները, այնպես էլ, թերության դեպքում, մեքենայի նստելատեղերը, ղեկը, դռները։ Մի խոսքով, եթե մեքենան ունի թեկուզ փոքրիկ անսարքություն կամ իր տեղից խախտված դետալ, այն պետք է հնարավորինս արագ կարգի բերել, այլապես  աղմկոտ երթևեկությունն ապահովված է: Բացի այդ, աղմուկից  հաջողությամբ պաշտպանում է ձայնամեկուսացումը, ինչը վարպետությամբ կարող է իրականացնել մասնագետը: Ձայնամեկուսացմանը հաջորդում է արդեն մյուս քայլը` մեքենան որակյալ  աուդիոհամակարգով համալրելը:

Մատչելի տարբերակ

Նվագարկիչ, մեքենայի դիմացի և հետևի մասում տեղադրված երկուական դինամիկ-ներ… և վերջ: Գրեթե բոլոր մեքենաները գործարանից դուրս գալիս համալրված են լինում նման աուդիոհամակարգով: Այս տարբերակը միանգամայն հարմար է քեզ, եթե երաժշտությունը քեզ համար ընդամենը միջավայր է: Ուժեղացուցիչն այս դեպքում տեղադրված է լինում հենց նվագարկչի մեջ:

Հաշվի առ, որ նման աուդիոհամակարգի դեպքում խորհուրդ չի տրվում շատ բարձրացնել երաժշտությունը, եթե, իհարկե, չես ուզում հիասթափվել սիրածդ կատարումից: Կարող ես գումար տնտեսել նման աուդիոհամակարգով բավարար-վելու դեպքում, միայն թե  ուշադրություն դարձրու, որ դինամիկներն ու նվագարկիչը նույն հավասարության վրա լինեն. այսպես ձայնը բարձրացնելու դեպքում գոնե մոտավորապես կհասկանաս` երգի կատարողն աղջիկ է, թե տղա:

Հարմարավետ տարբերակ

Նվագարկիչ, դիմացի դինամիկները միացված են երկելք ուժեղացուցչին, հետևի դինամիկները` մեքենայի ռադիոյի հետնամասին: Այս պարագայում անհրաժեշտ է հաշվի առնել, որ նվագարկիչը պետք է ունենա ամենաքիչը մեկ գծի ելք:  Ցանկալի է, որ այս բոլոր միացումները և տեղադրումն անի մասնագետը, քանի որ մեքենան մշտապես շարժման մեջ է գտնվում, և դինամիկները պետք է ճիշտ ու հաշվարկված տեղում տեղադրված լինեն` ձայնային տհաճ ալիքներ չստեղծելու համար: Աուդիոհամակարգի այս տարբերակը քեզանից մի փոքր ավելի շատ ֆինանսական ներդրում կպահանջի, բայց փոխարենը, ինքնամոռաց ձայնակցելով, ուզածիդ չափ կվայելես քո ու սիրելիիդ «հիթն» իր ողջ հնչեղությամբ:

Բարձրակարգ տարբերակ

Ուժեղացուցիչներին միացված նվագարկիչ, դիմային դինամիկներ և սաբվուֆներ: Նվագարկիչը պետք է ունենա ամենաքիչը երկգծային ելք: Անհրաժեշտ սարքավորումները ձեռք բերելուց հետո պետք է գնաս բանիմաց մասնագետի մոտ, ով էլ իր հերթին պետք է կարողանա ճիշտ տեղադրել թանկարժեք աուդիոսարքերը: Չմոռանաս նաև ձայնամեկուսացման մասին, ինչը խորհուրդ է տրվում անել աուդիոսարքերը տեղադրելու հետ միասին: Մասնագետ ընտրելիս  մի փոքր ուշադիր եղիր, քանի որ մեքենայում աուդիոսարքերի տեղադրումը պետք է արվի բարձր մակարդակով, որպեսզի ձայնային ալիքները ճիշտ և համապատասխան տարածվեն:  Դու բավականին կլորիկ գումար կծախսես մեքենայումդ բարձրակարգ աուդիոհամակարգ ունենալու համար, սակայն կարող ես վստահ լինել, որ դրանով երաժշտության գերազանց հնչեղությունը երաշխավորված կլինի:

Ցանկալի է…

Միջին, ցածր կամ բարձրակարգ աուդիոսարքեր ձեռք բերելիս ուշադրություն դարձրու նաև դրանց դիզայնին և գույնին, եթե, իհարկե, քեզ հետաքրքրում է  մեքենայիդ սրահի գրավչությունը. չէ± որ այնտեղ շատ ժամանակ ես անցկացնում, ուստի պետք չէ ընտրել սև գույնի նվագարկիչ, սպիտակ դինամիկներ, բաց շագանակագույն ուժեղացուցիչ։ Մի խոսքով՝ աշխատիր աուդիոսարքերի գունային գամման հնարավորինս հարմարեցնել միմյանց: Այստեղ էլ է քեզ անհրաժեշտ մասնագետի աջակցությունը. ինքդ չես կարող հասկանալ, որ, ասենք, դինամիկի կողքից գնացող կարմիր ու գեղեցիկ գծերը տեղադրելուց հետո չեն երևալու և բազմաթիվ նման նրբություններ։ Ուստի մի՛ ծուլացիր և աուդիոսարքեր ձեռք բերելու գնա մասնագետի հետ միասին:

Վերջնական ստուգում…

Աուդիոհամակարգը տեղադրելուց հետո պետք է հասկանալ` ստացվել է այն, ինչ ուզում էիր, թե առանձնապես ոչինչ չի փոխվել, ու նորից չի հասկացվում՝ լսածդ երգը հայերեն է, թե, ասենք, հունարեն: Ստուգելու համար քեզ պետք կգա պրոֆեսիոնալ սարքերով ձայնագրված  ձայնասկավառակ, որը կարող ես գնել` նախապես ասելով, թե ինչի համար է այն քեզ պետք ու ինչքան կարևոր է, որ իրոք որակյալ ձայնասկավառակ լինի։ Կարծում եմ՝ վաճառողը բարեխիղճ կգտնվի ու կեղծ արտադրանքը չի տա քեզ բնօրինակի փոխարեն:

Ճիշտ հավաքված աուդիոհամակարգի պարագայում երաժշտությունը միացնելիս դու քեզ պետք է զգաս համերգային դահլիճում, այլ ոչ թե բեմի վրա` հարվածային գործիքների կողքին նստած: Հաշվի առ, որ նույնիսկ բարձրակարգ ու թանկարժեք աուդիոսարքերը չեն պարգևի քեզ որակյալ երաժշտություն, եթե ճիշտ տեղադրված չլինեն։ Ուստի դրանք տեղադրելու համար պետք չէ գումար խնայելու նպատակով դիմել հարևան «դզող-փչողին», այլ՝ միայն բարձրակարգ մասնագետի: 

http://www.cosmo.am/