Ինչպես ավելի վաղ հայտնել էր SHAMSHYAN.com-ը, հոկտեմբերի 4-ին ողբերգական ավտովթար էր տեղի ունեցել Լոռու մարզում: Ժամը 18:40-ի սահմաններում Տաշիր-Ստեփանավան ավտոճանապարհի 9-րդ կմ հատվածում Սարատովկա գյուղի բնակիչ, 27-ամյա Գևորգ Հակոբյանը վարելով Opel Vectra մակնիշի 09 ՏՍ 629 համարանիշի ավտոմեքենան, դուրս էր եկել ճանապարհի երթևեկելի գոտուց դեպի ձախակողմյան հատված և բախվել ծառին: Ինչպես ավելի վաղ հայտնել էր ֆոտոլրագրող Գագիկ Շամշյանը, վթարի հետևանքով 2 հոգի մահացել էին, իսկ 1 հոգի տեղափոխվել էր հիվանդանոց: Դեպքի վայր էր ժամանել ոստիկանության Լոռու մարզային վարչության օպերատիվ խումբը՝ վարչության պետ Անուբախ Համբարյանի գլխավորությամբ: Տեղում էին նաև ճանապարհային ոստիկանության 2-րդ սպայական գումարտակի 5-րդ վաշտի հրամանատար Էդգար Սուսլիյանը, հրամանատարի տեղակալ Մարտին Բալայանը: Պարզվել էր, որ տեղում մահացել էին վարորդ Գ. Հակոբյանն ու ուղևոր, Սարատովկա գյուղի բնակիչ, 30-ամյա Կարեն Մուսայելյանը, իսկ ուղևոր, Բովաձոր գյուղի բնակիչ, 30-ամյա Մովսես Վարոսյանը տեղափոխվել էր Տաշիրի բժշկական կենտրոն: Ֆոտոլրագրողը հայտնում է, որ վարորդ Գ. Հակոբյանը աշխատում էր Սարատովկա գյուղի միջնակարգ դպրոցում՝ որպես համակարգչային օպերատոր, Կ. Մուսայելյանը՝ ՀՀ Արտակարգ իրավիճակների նախարարության փրկարար ծառայության Տաշիրի հրշեջ մասի 3-րդ հերթափոխի օղակի հրամանատար, վիրավոր Մ. Վարոսյանը՝ Տաշիրի հրշեջ մասում՝ որպես վարորդ: Փաստի առթիվ ոստիկանության քննչական գլխավոր վարչության Լոռու մարզի քննչական բաժնի Տաշիրի քննչական բաժանմունքում հարուցվել է քրեական գործ՝ ՀՀ քր.օր-ի 242 հոդվածի 3-րդ մասի հատկանիշներով:

shamshyan.com