Եթե ապարդյուն են անցնում Ձեր բոլոր սիրային հանդիպումները, եթե Դուք այդպես էլ չեք կարողանում գտնել Ձեր միակին, ուրեմն ժամանակն է փոխելու իրական զգացմունքների հանդեպ Ձեր մոտեցումը: Ներկայացնում ենք Ձեզ մի քանի համընդհանուր սխալներ, որոնք անում են միայնակ կանայք հարաբերություններ սկսելիս:

Ես արժանի չեմ

Եթե Դուք համոզված եք, որ արժանի չեք սիրո, ապա այդպես էլ չեք ստանա այն: Շատ կանայք ապարդյուն, անհետևանք հանդիպումներից, ժամադրություններից և բաժանություններից հետո սկսում են հայտարարել, որ դա անեծք է կամ ճակատագիր: Նրանք անդադար կրկնում են, որ ոչ մեկին պետք չեն, որ ծնվել են միայնակ լինելու համար և այլն: Իհարկե, բոլորն էլ արժանի են սիրո: Սակայն եթե նախապես Ձեր մոտեցումը բացասական է, լցված անհավատությամբ, ապա դա արտացոլվում է Ձեր յուրաքանչյուր ժեստում, խոսքում:
Փոխանակ ամեն հանդիպած տղամարդուն կառչելուն և մտածելուն, որ դա Ձեր վերջին հնարավորությունն է, մտածեք, որ Ձեզ շատ ավելի մեծ սեր է սպասվում:
Կարող եք խնդրել ընկերուհիներին գրել Ձեր լավ հատկանիշների մասին և փակցրեք այդ ցուցակը Ձեր օրագրի առաջին էջին:

Բոլոր տղամարդիկ տխմարներ են

Դադարեք մտածել, որ տղամարդիկ Ձեր թշնամիներն են: Կյանքն իսկապես ապացուցում է, որ լավ տղամարդիկ ավելի քիչ են, քան սրիկաները, սակայն Դուք կարող եք հանդիպել Ձեզ արժանի տղամարդու անկասկած. նրանք այնքան քիչ չեն, որ հենց Ձեզ բաժին չհասնի:
Սովորաբար կանանց ձգում են վատ վարքի տեր տղամարդիկ, որոնք որոշ ժամանակ անց չեն պատասխանում զանգերին, մոռանում են մեզ և այլն: Դրա համար մի փակեք Ձեր աչքերն ու կրկնեք միևնույն բառերը, այլ ակտիվ փնտրեք, սպասեք և միանգամից կարծիք մի կազմեք, ճանաչեք Ձեզ շրջապատողներին: Ճիշտ ընտրությունը կարող է Ձեզ անսահման երջանկություն պարգևել, թող որ դա չլինի առաջին հայացքից, այլ 10-րդ հանդիպումից հետո:

Միայն իմը

Կանանց մի տեսակ պարզապես չի ընդունում, որ տղամարդն իրենից այն կողմ կարող է հետաքրքրություններ ունենալ, զբաղմունք գտնել: Նրանք միշտ փորձում են իրենց կողքի պահել տղամարդուն, նրանց համար տարօրինակ են թվում ընկերական հավաքները, միջոցառումները և այլն: Տղամարդկանց պետք է որոշ չափով ազատություն տալ, բաց թողնել, որպեսզի նա իր կամքով վերադառնա:

Ես միշտ ճիշտ եմ

Եթե Դուք կարծում եք, որ միշտ պետք է ճիշտ լինեք, ապա դա տարօրինակ է: Ասենք' դուք շատ ընդհանուր բաներ ունեք' նույն մասնագիտությունը, հոբբին, սիրած զբաղմունքը, հանգիստն անցկացնելու տարբերակը և այլն: Եթե Դուք մասնագիտության առումով ավելի պատրաստված եք, ավելի առաջատար կամ ծանոթ եք ավելի կարևոր նրբությունների, քան Ձեր տղամարդը, դա դեռ չի նշանակում, որ նույնչափ լավ եք հասկանում մարտկոցներից, վիսկիից, քան Ձեր զուգընկերը: Ճշմարտությանն անհագ ձգտումը նման է հիվանդության: Մի անգամ աչքի ընկած մարդը միշտ ուզում է առաջատար և ճշմարիտ լինել: Կանգ առնելը բավականին դժվար է, բայց հնարավոր: Ներողություն խնդրել և հայտնել, որ սխալվել եք, չի նշանակում ստորանալ կամ պատիվը գցել: Մանավանդ սիրո հարցում պետք է զիջել, պետք է համբերատար լինել: