Այսօր մամուլում լուրեր էին շրջանառվում, որ ՀՀ սպորտի և երիտասարդության հարցերի նախարար Յուրի Վարդանյանի ավագ որդին մոտ մեկ շաբաթ առաջ ձերբակալվել է Իրան-Հայաստան սահմանին: Պարզելու համար, թե որքանով է այս տեղեկատվությունը համապատասխանում իրականությանը՝ Slaq.am-ին ՀՀ ոստիկանության լրատվության բաժնից հաստատեցին այդ տեղեկատվությունը և նշեցին, որ Յուրի Վարդանյանի ավագ որդին՝ 29-ամյա Դավիթ Վարդանյանը սահմանակետով թմրանյութ անցկացնելու դեպքի առթիվ քրեական գործ է հարուցվել:

Ոստիկանության լրատվական ծառայությունին տեղեկացրեցին, որ 2013թ հոկտեմբերի 13-ին ՔՕ-ի 268-րդ հոդվածի 3-րդ մասի (առանց իրացնելու նպատակի առանձնապես խոշոր չափերով թմրամիջոցներ կամ հոգեմետ (հոգեներգործուն) նյութեր ապօրինի շրջանառությունը, պատժվում է ազատազրկմամբ` 2-6 տարի ժամկետով) և 215 հոդվածի 2-րդ մասի (մաքսանենգություն, պատժվում է ազատազրկմամբ՝ 4-8 տարի ժամկետով՝ գույքի բռնագրավմամբ) հատկանիշներով ոստիկանության Սյունիքի մարզային քննչական բաժնում հարուցվել է քրգործ: Հոկտեմբերի 15-ին մեղադրանք է առաջադրվել Դավիթ Վարդանյանին եւ նրա նկատմամբ որպես խափանման միջոց է ընտրվել կալանավորումը:

Հոկտեմբերի 16-ին քրեական գործը ընդունվել է վարույթ քննչական գլխավոր վարչության ՀԿԳ գլխավոր վարչությունում: Նախաքննությունը շարունակվում է: