Հայերս գործարար ասելով` պատկերացնում ենք տղամարդու, ով արական սեռին բնորոշ հեղինակությամբ ու ինչ-որ տեղ նաև իշխող հատկությամբ կարող է հաջողակ կառավարել իր բիզնեսները: 
Հայաստանում տարեց տարի էլ ավելի է կարևորվում կնոջ դերը: Եթե տարիներ առաջ տղամարդիկ կնոջը բացառապես պատկերացնում էին տանը` զավակների կողքին, ապա այժմ այդ պատկերացումները, բարեբախտաբար, փոխվել են. կանայք ևս ակտիվ հասարակության մասն են կազմում և գործնականում նրանցից շատերն ունակ են իրականացնել տղամարդկանց գործառույթները: 
Ինչ խոսք, այս նոր ընկալման մեջ մեծ է հենց կանանց դերը. նախևառաջ իրենք իրենց գործունեությամբ ապացուցեցին, որ կարող են լինել հաջողակ գործարարներ` անգամ շատ բիզնեսմեններից էլ լավը:
Թեպետ Հայաստանում բիզնես լեդիները շատ չեն, սակայն տարեց տարի նրանց թիվն ավելանում է: Ձեզ ենք ներկայացնում Հայաստանի ամենաճանաչված և հաջողակ կին գործարաներից մի քանիսին.

Սիլվա Համբարձումյան-Հաջողակ կին գործարարը բիզնես գործունեություն է ծավալել դեռևս 90-ական թվականներից: Նա բիզնեսներ ունի ինչպես Հայաստանում, այնպես էլ արտերկրում: ժամանակին Սիլվա Համբարձումյանը հենց առաջինն է Հայաստան ներկրել սպիրտ, ձու, ցորեն եւ շաքարավազ:
Սիլվա Համբարձումյանը բիզնեսներ ունի հանքաարդյունաբերության ոլորտում. նա ունի ոսկու հանքեր: Այս կին գործարարին է պատկանում նաև «Կալաչ» հացի գործարանը:

Նաիրա Նահապետյանին ևս կարելի է դասել հաջողակ կին գործարարների թվին: Նա հանդիսանում է Հայաստանում Փոքր ՀԷԿ–երի Միության նախագահը:
Այս բիզնես լեդին Հանրապետական կուսակցությունից է և հանդիսանում է ՀՀԿ գործարար կանանց գործարարության աջակցման հանձնաժողովի նախագահը:
Նաիրա Նահապետյանը հիդրոէլեկտրակայանների դաշտում աշխատում է շուրջ 18 տարի:

Ռոզա Ծառուկյանը երկար տարիներ բիզնես գործունեություն է ծավալում: Պետք է նկատել, որ Ռոզա Ծառուկյանը, մինչ իր որդու բիզնես գործունենություն ծավալելը, արդեն զբաղվում էր բիզնեսով` զարկ տալով Հայաստանում մեղվաբուծությանը: Թերևս տիկին Ծառուկյանի շնորհիվ է, որ այսօր Հայաստանում կա մեղվաբուծության ոլորտը և, որպես այդպիսին, բավականին մեծ հռչակ ունի ամբողջ աշխարհում: Տիկին Ծառուկյանը բազմաճյուղ բիզնես ունի` ոչխարաբուծություն,անասնապահություն, մեղվաբուծություն, ջերմոցային տնտեսություն,հողագործություն,կաթնամթերքի արտադրություն:

Վարսենիկ Գրիգորյան- Գործարար Տիգրան Արզաքանցյանի մայրը արդեն երկար տարիներ է բիզնես գործունեությամբ է զբաղվում: Նա հանդիսանում է Օշականի գինու եւ կոնյակի գործարանի եւ «Տիգրան Արզաքանցյան» հիմնադրամի տնօրենը: Նա ղեկավարում է նաև «Աշտարակյան գինիներ» ՓԲԸ-ն:
Արզաքանցյանների ընտանիքը երկար տարիներ բնակվել է Ռուսաստանում: Վերադառնալով Հայաստան` նրանք սկսեցին բիզնես գործունեություն իրականացնել գինեգործության և կոնյակագործության ոլորտում: