Դիզայներները շարունակում են զարմացնել սանրվածքների նորանոր տարբերակների բազմազանությամբ: Այս գարուն-ամառ սեզոնի համար էլ թաց մազերի թրենդը «գրոհով» վերցրեց նորաձևության բեմահարթակները և ոչ միայն. աստղերը ևս անմիջապես փոխառեցին այն: Այսպիսով, մենք կփորձենք պարզել, թե ինչ է անհրաժեշտ նման սանրվածք ստանալու համար:

Նախապատրաստում

Մինչ հիմնական թեմային անցնելը պետք է կանգ առնել ամենակարևոր նախապայմանի վրա. եթե քո մազերը ներկից կամ արտաքին այլ անբարենպաստ ազդեցությունից չորացած են և ճյուղավորված, նույնիսկ ամենափորձառու վարսահարդարը չի կարող ստանալ գեղեցիկ թաց սանրվածք:

Ինչպես անել

1. Քամիր ջուրը նոր լվացած մազերիցդ, օգտագործիր կոնդիցիոներ կամ շիճուկ` մատներով հավասարաչափ տարածելով մազերի ողջ երկայնքով:

2. Մազերդ սանրիր լայն ատամնավոր սանրով՝ խճճվածությունից խուսափելու համար: Օգտագործիր ամուր ֆիքսացիայի գել մազերի ողջ երկայնքով՝ դրանց թաց տեսք հաղորդելու համար (ի դեպ, գելի փոխարեն կարող ես բնական յուղ օգտագործել): Ապա մազերդ սանրիր խիտ սանրով՝ թաց էֆեկտը ընդգծելու և սանրի մանր ակոսները շեշտելու համար:

3. Չորացրու մազերդ վարսահարդարիչով՝ օգտագործելով օդի հոսանքը կենտրոնացնող նեղ գլխադիր: Չորացրու միայն մեկ ուղղությամբ՝ մազերը հարթ պահելու համար:

4. Հետ սանրված մազերի դեպքում այս սեզոնին շատ նորաձև բարձր պոչիկ կարող ես կապել: Եթե սիրում ես մի կողմից բացված և ճակատի վրայով սահող մազեր, ապա պոչիկը պետք է համարյա պարանոցի վրա լինի. սանրվածքդ ֆիքսիր մետաղյա մազակալներով:

5. Ամենավերջում դիմիր մազերը ֆիքսող կամ փայլ հաղորդող սփրեյի օգնությանը՝ այս ու այն կողմ թեքված մանր մազիկները հարթեցնելու համար:

«Թաց» տրամադրություն աստղային երկնակամարում

Երկար մազեր՝ մեղրամոմ+գել
Կարճ մազեր՝ գել
Բարակ մազեր՝ ֆիքսող լաք և սփրեյ
Ալիքաձև մազեր՝ մուս
Շեկ մազեր՝ ֆիքսող լաք և մուս

Cosmo խորհուրդ

Թաց սանրվածքի էֆեկտը հատկապես գեղեցիկ է մուգ մազերի վրա։ Շիկահերները պետք է զգույշ լինեն. վերը թվարկված միջոցների չարաշահումը կարող է ոչ մաքուր մազերի տպավորություն թողնել:

cosmo.am