Այսօր՝ հոկտեմբերի 20-ին, խոշոր ավտովթար է տեղի ունեցել Կոտայքի մարզում: Ժամը 21:20-ի սահմաններում Եղվարդ-Երևան ավտոճանապարհի 32-րդ կմ հատվածում բախվել են BMW մակնիշի 04 ՍԼ 920 համարանիշի և Վազ 2121 մակնիշի 870 ՕԼ 64 համարանիշի ավտոմեքենաները:

Ինչպես վթարի վայրից հայտնում է ֆոտոլրագրող Գագիկ Շամշյանը, վթարի հետևանքով 6 հոգի մարմնական վնասվածքներով տեղափոխվել են հիվանդանոցներ. 3 հոգի՝ Եղվարդի բժշկական կենտրոն, 3 հոգի՝ «Արմենիա» բժշկական կենտրոն, իսկ 1 հոգի՝ «Էրեբունի» բժշկական կենտրոն: Ֆոտոլրագրողը հայտնում է, որ վթարի վայր են ժամանել ճանապարհային ոստիկանության 2-րդ սպայական գումարտակի 3-րդ վաշտի աշխատակիցները՝ վաշտի հրամանատար Նիկողայոս Եղիազարյանի գլխավորությամբ: Վիրավորներին ավտոմեքենաներից դուրս են բերել Նաիրիի հրշեջ-փրկարարներն ու քաղաքացիները: Այս պահին դեպքի վայրում աշխատում է ոստիկանության Նաիրիի բաժնի օպերատիվ քննչական խումբը, ովքեր քննիչի գլխավորությամբ պարզում են վարորդների և վիրավորների ինքնությունը:

Վթարի վայրում հավաքվածները ֆոտոլրագրողին հայտնել են, որ վիրավորների մեջ է նաև հայտնի դերասան Վարդան Պետրոսյանը, ում քիչ առաջ՝ ֆոտոլրագրողի տեղեկություններով, շտապօգնության բրիգադը Եղվարդի բժշկական կենտրոնից տեղափոխեց Երևան, ու եթե շտապօգնության բրիգադները ժամանակին չհասնեին վթարի վայր, վիրավորներին ստիպված քաղաքացիներն էին տեղափոխելու: Մինչ վթարի վայրում ոստիկանները գործողություններ էին կատարում, հիվանդանոցից տեղեկություններ ստացան, որ վիրավորներից մեկը մահացել է: Մանրամասները՝ քիչ ուշ:

shamshyan.com