Էրեբունի և Նուբարաշեն վարչական շրջանների ընդհանուր իրավասության դատարանում ավարտվել է բժիշկ-գինեկոլոգ Վարուժան Մարդանյանի գործի դատավարությունը:

49-ամյա Վ.Մարդանյանն աշխատել է «Գրիգոր Նարեկացի» բժշկական կենտրոնի վիրաբուժագինեկոլոգիական բաժանմունքում` որպես մանկաբարձ-գինեկոլոգ:

Ըստ դատական ակտի` Լոռու մարզի Ջրաշեն գյուղի բնակչուհի Հրածին Մալխասյանը 2012թ. հուլիսի 27-ին Վ.Մարդանյանի կողմից ընդունվել է նշված բժշկակական կենտրոն: Կինը գտնվել է հղիության 26-27 շաբաթական ցիկլում և հանդիսացել ռիսկի խմբի ծննդկան:

Բժիշկ Մարդանյանը իրականացրել է հղիի ոչ բավարար ծավալի հետազոտություններ, մասնավորապես` արյան բիոքիմիական քննություն, սոնոգրաֆիա, որի արդյունքում կատարել է սխալ ախտորոշում: Բժիշկ Մարդանյանը չի կատարել նաև արյան կոագուլոգրամմա` որոշելու համար հղիի մոտ առկա ճարպակալումը հայտնաբերելու և որպես ռիսկի խմբի ծննդկան նրան պարտադիր երրորդ մակարդակի ծննդօգնության հիմնարկություն տեղափոխելու համար:

Այս ամենի հետևանքով` հղիի մոտ սկսվել է վաղաժամ ծննդաբերություն. ծնվել է մահացած իգական սեռի պտուղ: Ծննդաբերությունից 15 րոպե անց Հրածին Մալխասյանի մոտ սկսվել է առատ արյունահոսություն, որը պայմանավորված է եղել նաև բուժող բժշկի կողմից ընտրված ոչ ճիշտ մեթոդիկայով: Շտապ վիրահատություն սկսելու փոխարեն Մարդանյանն այն կատարել է ուշացումով, իսկ հետվիրահատական շրջանում որովայնի սոնոգրաֆիա չկատարելը հանգեցրել է կնոջ որովայնի խոռոչում արյան առկայության չհայտնաբերմանը: Արյունահոսությունը շարունակվել է, որի արդյունքում Հ.Մալխասյանը մահացել է:

Դատարանում Վ.Մարդանյանն իրեն մեղավոր է ճանաչել և Էրեբունի և Նուբարաշեն վարչական շրջանների ընդհանուր իրավասության դատարանը նրան դատապարտել է ազատազրկման` 2 տարի ժամկետով` 3 տարի ժամկետով զրկելով մասնագիտական գործունեությամբ զբաղվելու իրավունքից:

Հոդվածն ամբողջությամբ կարդացեք «Ժամանակ» օրաթերթի` 11.10.2013թ. համարում: